Povedala vam bum koj su negda naše babice priredile za vuzmene dane. Ne žalosni petek je post i nemrs. Babica bi vjutre spekla krampiera v rohlje i saki si je male zagrizel. Optem su bili do obeda, a onda su jeli bielu juhu ili krampier na čistu juhu. Spekla je i hrženi kruh. Poklje bi pojeli još male suhih sliv ili suhega sira. Mouži te dan nisu nič vina pili, da bi se prisietili Isusove mouke.

Na Veliku subotu  mouži  su slagali po bregima  vuzmenjake koje bi vužgali na Vuzem,  rane vjutre. Verovale se, dokle seže  dim vuzmenjaka zle sile nemaju vlast. Hvečer se išle k večernice, na blagoslov ognja i vode. Nosila se gouba obešena na drot, da se ne spečeš kad ideš dime. Doma se nakadile oko hiže i štale, a onda se gouba dela v šporet i gorela je do jutra da je  babica mogla  na tem ognju  početi kuhati jesti.

S blagoslovljenu vodu poškropile se oko hiži da  bi se otirala  sa gamad. Gazdarica  je na Veliku subotu pripravljala jele za blagoslov. Pekla je gibanicu, kuglof, kruh, kuhala je šunku i s decu farbala jajca. Se to složila je v košaru  koju je  na blagoslov nosila najmlajša sneha.

Si su se s blagoslova žurili dime, jer do prvi dojde, te bu prvi kuruzu okopal. Najstariješi član obitelji prve je snel s košare hren i razrezal ga na onulike komadi kulike je ljudi  bile v hiži. Prve su pojeli hren da se zmisle na Isusovu mouku, onda jajca i mladi luk, a na kraju šunku i gibanicu. Se droptinje se pobralo sa stola i hitilo v ogenj. Nič nije smele opasti na pod. Kost od šunke se pospravila med semenje da bi ljetina bila bolja.